't Rendement van de fieësttent

Koeplet 1:
Ich zeen 't zoeë weer väör mich, zoot bie pap hoeëg in de nek
Same optocht kieke, dae tied waas ech te gek
Ein sjipstoet mèt konfetti, waat haaje wae plezeer
Die auge en dae lach, onvergaetelik steeds weer
Noe vèltj mich ’t kwartje, es ich det hie bekiek
Door die groeëte klein momente, veul ich mich zoeë riek

Refrein: 
‘t Rendement van de fieësttent is hoeëger den de bank
Ich verdeen neet mèt wèrke, waat ich verdeen dees drie daag langk
Geweldjig is dees vrindjsjap, onbetaalbaar diene lach
En vastelaovesäöveroeëre, tèlle döbbel deze nach
Al doortj 't mer efkes, doe veuls ‘t ein jaor langk
‘t Rendement van de fieësttent is hoeëger den de bank

Koeplet 2: 
Dao ligktj weer dezelfdje, Half sjlaopend aan 't buffet
Maar och wat maaktj det oet, hae haet 't weer geredj
Miene sjmienk is oetgeloupe, de panty ramkapot
Mer 't ergste nog van alles, is det ich nao hoes toe mot
Noe vèltj mich ’t kwartje, es ich det hie bekiek
Door die groeëte klein momente, veul ich mich zoeë riek

Brug:
Ich maak herinneringe väör 't laeve
Bewaar ze väör altied
Dao kin ich weer ein jaor op taere
Die raak ich noeëts mieër kwiet